Jesen va leprinačken vrtiće

Jesen je i ovo leto arivala va leprinački vrtić i pustila si gušti ki god je mogla. Malo po malo, vrtićen se j širil dih pečenega maruna. Kuhala se j dobra juha od tikav, parićali smo kompot od jabuk, spekli najukusneji krušići. Pokušali smo marmeladu od črešanj, smokav i čišpav, kako i još čuda nekemu noveh, nekemu stareh gušti (orehi, lešnjaki, grozje…)

Da ne bi bilo da smo samo jili i pili, magari smo i to fanj, užali smo poć i prošetat okol vrtića i gledat ča se to dogaja z okolnen drevun, ko je počelo gubit svoja pera sakakoveh kolori.

Za „Noć Štrigi“ složili  smo najslaji paučići od baškotini, a od beleh facolić delali smo „strašni duhi“.

Provevali smo bit i mići slikari, slikajuć frmentu, pera, jabuke, maruni i još čuda jesenskeh plodi, keh smo z velen guštun prepoznavali, imenovali, tikali, slagali, sortirali…

Na sam dan naše jesenske fešti, kantali smo, tancali i takmičili se z karijolami va našoj dvorane i još se jedanput počastili z dišenemi maruni.

Va veselen i zaigranen raspoloženju, nastavjamo ovu našu priču z va zadnje vreme jako čestun porukun, a ta je „ostanimo odgovorni“, ali ni problem…tr… „ČA JE TO ZA NAS“

Lp, do nekega drugega javjanja,

Leprinački vrtićarci.